5-anyos na paslit natusta sa sunog
MANILA, Philippines - Natusta nang buhay ang isang 5-anyos na paslit, samantalang tatlo pa ang sugatan habang tinatayang aabot sa humigit-kumulang sa 300 pamilya ang nawalan ng tirahan nang masunog ang ilang kabahayan kahapon ng madaling araw sa Taguig City.
Dead on the spot ang biktimang si Christine Noces, matapos itong ma-trap sa loob ng kanilang bahay hanggang sa masunog nang buhay sa Purok 6, Kawayanan, Cayetano St., Brgy. Tuktukan ng naturang lungsod.
Iniimbestigahan pa ng mga awtoridad, kung nasaan ang mga magulang ni Notes habang nagaganap ang sunog.
Samantala, nakilala naman ang mga sugatan na sina Aldrin Carbon; Marites Fernandez at Carmina Alfonso.
Ayon sa imbestigasyon ni SFO1 Aresteo Reloj, ng Taguig City Bureau of Fire, nagsimula ang sunog pasado alas-12:00 ng madaling araw sa bahay ng isang Benjie German, kapitbahay ng nasawing si Notes.
Dahil gawa lamang sa lights material ay mabilis na kumalat ang apoy sa iba pang kabahayan at tinatayang humigit kumulang sa 300 pamilya ang nawalan nang matitirhan.
Kamuntik ng madamay ang isang warehouse malapit sa nasunog na residential area, ngunit naagapan ito sa tulong ng matataas na firewall ng establisimiyento.
Umabot sa ikalimang alarma ang sunog bago idineklarang fire under control ala-1:50 kahapon ng madaling araw.
Ayon sa mga awtoridad, tinatayang aabot sa P300,000 halaga ng mga ari-arian ang napinsala, na tumupok sa 20 kabahayan.
Isa sa mga sinisilip na pinagmulan ng apoy ay ang napabayaang nakasinding kandila dahil wala raw kuryente sa bahay nina German nang mangyari ang sunog.
- Latest
