Tsinoy na miyembro ng drug syndicate, tiklo
MANILA, Philippines – Nahuli ng mga elemento ng Quezon City Police District sa ilalim ng ‘Oplan Lambat Sibat’ ang isang Filipino-Chinese na pinaniniwalaang miyembro ng isang bigtime drug syndicate makaraang mahulihan ng mga baril sa lungsod.
Kinilala ni QCPD director Chief Supt.Edgardo G. Tinio ang suspek na si Mike Ngo, 47 , ng Major Dizon St., Industrial Valley, Marikina City.
Sa report ni QCPD PIO chief P/Chief Insp. Jeffrey Bilaro, ganap na alas - 10:30 kamakalawa ng gabi nang arestuhin si Ngo na nakumpiskahan ng mga baril sa isinagawang raid ng mga awtoridad sa may Crest Apartelle sa Annapolis St., Cubao, Quezon City.
Nabatid na si Ngo ay miyembro ng bigtime drug syndicate na kumikilos sa National Capital Region (NCR) na matagal nang pinaghahanap.
Lumitaw sa imbestigasyon na ang suspek ay may warrant of arrest mula sa korte dahil sa kasong paglabag sa Republic Act 9165 o Comprehensive Dangerous Drug Act of 2002.
Bago ang paghuli kay Ngo, isang confidential informant ang nagturo sa kinaroroonan nito.
Nasamsam ng mga operatiba ng QCPD – DSOU sa suspek ang isang kalibre .22 na baril na may lamang walong piraso ng bala, isang kalibre .357 na baril na may lamang anim na bala na nakuha mula sa loob ng kanyang Toyota Altis (WSI-499).
Kasong paglabag sa RA 10591 o Comprehensive Law on Firearms and Ammunitions Act at paglabag sa election code o gunban ang isinampa laban kay Ngo.
- Latest