Sa Caloocan Shabu tiangge sinalakay: 4 arestado
MANILA, Philippines - Apat na hinihinalang mga kilabot na tulak ng iligal na droga ang na-dakip sa ikinasang operasyon ng Northern Police District- Criminal Investigation and Detective Management Group sa hilera ng mga bahay na ginagawang shabu tiangge sa Caloocan City.
Nakilala ang mga naaresto na sina Ba-shier Tarusan Alluya, 45-53 anyos; Salic Masmar, 36; Malic Bala at Camar Mama, pawang mga residente ng Sampaloc Street, Muslim area, Brgy. Camarin, ng naturang lungsod.
Sa inisyal na ulat, dakong alas-4 ng mada-ling araw nang ikasa ng CIDG ang operasyon sa naturang lugar at upang arestuhin ang anim na target ng Warrant of arrest kabilang sina Tarusan Alluya, Masmar at Bala.
Matagumpay na nasakote sina Alluya, Masmar at Bala nang mapasok ang anim na magkakadikit na bahay ng mga pulis na naka-full battle gear.
Nadakip naman si Mama nang nagtangkang tumakas sa loob ng bahay ng isa sa mga target na si Usman Macadatu. Itinanggi naman ni Mama na siya si Macadatu ngunit dinakip pa rin ito ng mga otoridad para sa berepikasyon.
Nakumpiska ng pulisya sa bahay ni Tarusan Alluya ang isang kalibre .45 baril, 2 pakete ng hinihinalang shabu; habang isang espada at kalibre .9mm pistol naman ang nakumpiska kay Bala.
Ayon sa pulisya, notoryus na umano ang lugar sa lantarang bentahan ng iligal na droga habang sa loob na rin ng mga bahay nagsa-sagawa ng pot session ang mga parukyano.
Estilo rin umano ng mga suspek ang magpautang sa mga kapitbahay at kapag hindi nakabayad ay sasamsamin ang mga gamit sa bahay at ma-ging mga lupa. Ang mga suspek rin ang tinitignan na posibleng sangkot sa dalawang kaso ng pagpatay sa lugar.
- Latest