Rider nabundol, nakaladkad ng van

MANILA, Philippines – Agad na nasawi ang isang motorcycle rider makaraang mabundol at makaladkad pa ng isang service van ng isang kompanya sa panulukan ng isang highway sa Caloocan City, kamakalawa.

Hindi na umabot ng buhay sa Caloocan City Medical Center dahil sa matinding pinsala sa ulo at katawan ang biktimang si John Anthony Callueng, 45, binata, ng Hernandez Street, Brgy. Catmon, Malabon City.

Naaresto naman ng pulisya si Butch Garcia, 35, ng GMA, Cavite, at tsuper ng Mitsubishi L-300 FB van na nakarehistro sa United Steel Master Mfg. Corporation.

Sa ulat ng Caloocan City Police, binabagtas ni Callueng ang 9th Avenue dakong alas- 8:30 ng umaga nang mabundol ng FB van pagsapit sa Boni Serrano Avenue sa Brgy. 108.

Pagkabagsak, nakaladkad pa ng higit 20 metro ang biktima bago tuluyang nakahinto ang behikulo.

Isa sa “accident prone” ang Boni Serrano Avenue sa Caloocan dahil sa kawalan ng sapat na mga traffic lights sa mga intersection habang matutulin ang takbo ng mga motorsiklo sa lugar.