Trak-trak pa ng mga campaign materials, nahakot ng MMDA
MANILA, Philippines – Sa ikalawang araw ng isinasagawang ‘Oplan Baklas’ ng MMDA, muli silang nakahakot ng trak-trak na campaign materials sa isinagawang pagbabaklas sa ilang lugar sa Kalakhang Maynila.
Kahapon ay sinuyod ng MMDA ang ilang mga lugar sa Maynila at Quezon City.
Habang sinusuyod ang kahabaan ng Road 10 sa Tondo gayundin sa Moriones tumambad sa kanila ang nagkalat na mga campaign posters matapos ang isinagawang proclamation rally kamakalawa ng gabi ng grupo ni Davao Mayor Rodrigo Duterte at ang running mate nito na si Senador Peter Alan Cayetano.
Maging ang kahabaan ng Padre Burgos patungong Quiapo kasama ang Plaza Miranda ay tadtad rin ng mga campaign materials dahil sa idinaos na rally naman nina Senators Grace Poe at Chiz Escudero.
Bukod sa Maynila, tinungo rin ng grupo ang bahagi ng Quezon City partikular sa may Roosevelt hanggang Congresional Avenue sa Quezon City na kung saan marami ring nakasabit na campaign posters na labas sa common poster area.
Nabatid na sa unang araw ng “Oplan Baklas Operation”, umabot sa isang truckload ng mga campaign posters at streamers ang nahakot ng ahensiya.
- Latest