Binatilyo todas sa gang war
MANILA, Philippines – Isang binatilyo ang nasawi sa naganap na gang war, kahapon ng madaling-araw sa Tondo, Maynila.
Saksak sa kaliwang dibdib ang tinamo ni Jomar Hermano, 15, out of school youth. Namatay ito habang nilalapatan ng lunas sa Justice Jose Abad Santos General Hospital (JJASGH).
Tumakas naman ang suspek na nakilala sa alyas na Eric Sarmiento at iba pang kasamahan nito sa grupo.
Lumilitaw sa imbestigasyon ni SPO3 Milbert Balinggan ng Manila Police District-homicide section na naganap ang insidente dakong alas-3:13 ng madaling-araw sa may Zaragosa corner Delpan Sts. Tondo, Maynila.
Sa impormasyon nakuha ng pulisya, naglalakad ang biktima papauwi nang madaanan ang grupo ng mga suspek na aabot sa pitong katao.
Bigla na lamang nagkaroon ng riot sa magkabilang panig hanggang masaksak ang biktima. Nang makitang napuruhan ang biktima ay agad namang nagsitakbo ang mga suspek sa iba’t ibang direksiyon. Nagsagawa naman ng follow-up operation ang pulisya pero nabigo na madakip ang suspek.
- Latest
