Unang araw ng kampanya, trapik dulot sa motorista
MANILA, Philippines – Nagdulot ng mabigat na daloy ng trapiko sa ilang pangunahing lansangan ng Kalakhang Maynila ang unang araw ng kampanya ng mga kandidato.
Sa monitoring ng Metropolitan Manila Development Authority (MMDA), matinding trapik ang naranasan partikular ng mga motoristang papasok ng Maynila.
Ito ay dahil na rin sa isinagawang proclamation rally ng grupo ni presidential candidate Senador Grace Poe at ang tumatakbong bise nito na si Sen. Chiz Escudero sa ilalim ng ‘Gobyernong may Puso’ sa Plaza Miranda, Quiapo, Maynila.
Walang anumang abiso ay isinara ng Manila Traffic Bureau ang parte ng Morayta papuntang Quiapo at dinivert ang lahat ng sasakyan patungong FEU Recto.
Nagkabuhol-buhol ang mga nabiglang motorista sa pagsasara ng kalsada.
Samantala, alas-3 naman ng hapon nang magsagawa ng proclamation rally sina Mayor Duterte at Sen. Peter Alan Cayetano sa Plaza Morga sa Tondo, Maynila kaya lalu nang walang masulingang daanan ang mga motorista.
Sa Mandaluyong City naman isinagawa ang rally ng UNA na pinangunahan ni presidential candidate Jejomar Binay at ka-tandem nitong si Sen. Gringo Honasan na sinasabing nagdulot din ng matinding trapik.
Bukod, dito, nakadagdag din ng matinding trapik ang isinasagawang road re-blocking sa area ng EDSA-Ortigas at sa Gil Puyat Avenue-Osmeña Highway sa Makati City, patungong Maynila.
Pasado alas-6:00 pa lang ng umaga kahapon ay matrapik na simula sa Alabang, Muntinlupa patungong EDSA at Maynila.
Hindi lamang ang kahabaan ng South Luzon Expressway (SLEX) ang matrapik maging ang bandang itaas ng Skyway ay halos dulo sa dulo ang bigat ng daloy ng trapiko.
Walang mapuntahan ang mga motorista, dahil maging sa mga service road ay “bumper to bumper” ang trapik.
Nabatid, kahapon araw ng Martes ang unang araw ng arangkada ng mga kandidato para sa kanilang pangangampanya.
- Latest