Ama todas sa anak
MANILA, Philippines - Arestado ang isang 47-anyos na lalaki makaraang mapaslang ang kanyang ama na hinampas niya ng kahoy sa ulo matapos ang mainitang pagtatalo kamakalawa ng gabi sa Navotas City.
Nakaditine ngayon sa Navotas City Police Detention Center ang suspek na si Ildefonso Roldan, ng Pescador Street, Brgy. Bangkulasi, ng naturang lungsod.
Naisugod naman sa Tondo Medical Center ang 72-anyos niyang ama na si Rogelio Sr. ngunit hindi na umabot ng buhay.
Sa salaysay sa pulisya ng saksing si Rogelio Roldan Jr., naabutan niyang nagtatalo ang ama at ka-patid sa hindi pa mabatid na dahilan sa loob ng kanilang bahay dakong alas-9 ng gabi.
Nakita niya na nakadampot ng kahoy si Ildefonso at hinampas sa ulo ang ama.
Naagaw naman umano ng matanda ang kahoy at nahampas naman sa katawan si Ildefonso.
Dito na pumagitna at umawat si Rogelio Jr. ngunit bumagsak sila sa kanilang pagpapambuno ng kapatid at mabagsakan ang ama na nawalan ng malay.
Mabilis na isinugod sa Tondo Medical Center ng magkapatid ang ama ngunit hindi na ito umabot ng buhay. Rumesponde naman ang mga tauhan ng Police Community Precinct 4 at naaresto si Ildefonso na nahaharap ngayon sa kasong parricide.
- Latest