Rider na parak, pisak sa trak

MANILA, Philippines – Utas ang isang bagitong pulis matapos itong masalpok ng isang pampasaherong jeep hanggang sa tumilapon at magulungan naman ng isang paparating na mixer truck habang­ ang una ay nagmomotorsiklo, kamakalawa ng gabi sa Taguig City.

Dead on the spot ang biktimang si PO1 Rodjie Son Mojica­, 27, ng Road 7, Brgy. North Daang Hari ng naturang lungsod sanhi ng tinamong matinding pinsala sa ulo at katawan. Samantala, nasa custody naman ng pulisya ang driver ng concrete mixer na si Rogie Jimenez, 42, na nahaharap sa kasong reckless imprudence resulting to homicide.

Pinaghahanap naman ang bumundol ditong driver ng jeep na agad na tumakas.

Ayon sa pagsisiyasat ni PO2 Vicente R. Antonio, ng Taguig City Traffic Bureau, naganap ang insidente alas-2:35 ng hapon sa South bound lane ng East Service Road, Brgy. Western Bicutan ng naturang lungsod.

Nabatid na sakay ang  biktima ng kanyang Yamaha motorcycle, na for registration habang nakabuntot ito sa isang pampasaherong jeep na hindi naplakahan.

Pinilit umano ng motorsiklo na mag-over-take sa jeep dahilan para ito mahagip kung saan tumilapon ang biktima.

Saktong paparating naman ang mixer ni Jimenez kaya ito nagulungan.

Samantala, ang driver naman ng jeep ay mabilis na tumakas, samantalang si Jimenez ay dinakip ng pulisya at naka-impound ang minamaneho nitong mixer truck sa Taguig City Traffic Bureau.