Mag-asawa niratrat sa loob ng kanilang bahay

MANILA, Philippines – Tadtad ng tama ng bala sa katawan at patay na nang matagpuan ang isang mag-asawa sa loob ng kanilang bahay sa lungsod Quezon, kahapon ng umaga.

Nakilala ang mga nasawi na sina Roberto Cuyo, 35, at asawang si Rosabel Cuyo, 30. Nadiskubre ang bangkay ng mga ito ng kanilang kapitbahay, ilang oras matapos na uma­lingawngaw ang mga putok ng baril mula sa kanilang bahay, ayon kay SPO4 Cris Zaldarriaga, may-hawak ng kaso.

Alas-7 ng umaga nang madiskubre ang bangkay ng mag-asawa sa loob ng kanilang bahay sa Manungdo Compound, Lansones St., Brgy. Payatas B, sa lungsod.

Sabi ng isang Mary Jane Cabildo, kapitbahay ng biktima, bago ang insidente, ganap na alas-12:30 ng madaling araw ay nagising umano siya sa sunud-sunod na mga putok­ ng baril mula sa labas ng kanyang bahay, kinabukasan na natuklasan ang bangkay ng mag-asawa na duguang nakahandusay sa kama.

Sa pagsisiyasat ng Scene of the Crime Operatives (SOCO) sa crime scene narekober sa lugar ang tatlong basyo ng kalibre 45 baril, isang plastic sachet na naglalaman ng umano’y shabu, dalawang walang lamang plastic sachet, dalawang piraso ng water pipe (tooter) na may liquid­ residue, piraso ng aluminum foil at dalawang piraso ng medicine droppers. Habang sa cursory examination naman sa bangkay ng dalawa ay nagtamo ang mga ito ng multiple gunshots wounds sa iba’t-ibang bahagi ng kanilang mga katawan.

Malaki ang hinala ng pulisya na may kinalaman sa ilega­l na droga ang naganap na krimen, habang patuloy pa rin ang isinasagawang imbestigasyon ukol dito.