Barangay kagawad lasog sa tren

MANILA, Philippines – Isang barangay kagawad ang  nasawi matapos na mahagip ng tren kahapon ng umaga sa  Sta. Mesa, Maynila.

Ayon kay Chief Insp. Olivia Sagaysay, hepe ng Manila Police District-Traffic Enforcement Unit,  dakong alas-9:22 ng umaga nang mahagip ng tren ang biktimang si Alberto Cadalo, 77,  ng  Sta.Mesa, Maynila na napag-alaman na isang brgy. kagawad.

Nabatid na  patungong Tutuban ang  tren na nasa Altura-PNR Station nang biglang tumawid ang biktima.

Hindi umano narinig ng biktima ang  busina ng  tren na may body number na MSC-907  hanggang sa  mahagip ito.

Madalas umanong nakikita ang biktima na patawid-tawid sa lugar tuwing umaga subalit hindi nito napansin at narinig ang  pagdating ng tren sa riles kahapon.