Kung ano ang tatakbuhin sa 2016 Isko wala pang desisyon
MANILA, Philippines - Tahasang sinabi ni Manila Vice Mayor Isko Moreno na hindi pa niya napag-iisipan at napagdesisyunan kung ano ang kanyang tatakbuhin sa 2016.
Ang reaksiyon ni Moreno ay tugon sa pahayag ni Manila Mayor Joseph Estrada na kinokonsidera nito ang re-election sakaling tumakbo sa mas mataas na posisyon ang bise alkalde.
Ayon kay Moreno, masyado pa umanong maaga para pag-usapan ang elections dahil mas nais niyang pagtuunan ng pansin ang mga proyekto na para sa mga Manilenyo.
“Mas maraming importanteng suliranin ang siyudad na nangangailangan ng pansin na mas mahalaga pa sa mga personal na ambisyon namin”, ani Moreno.
Giit ni Moreno, hindi lingid sa publiko na ambisyon niyang maging alkalde ng Maynila subalit ito ay bahagi pa lamang ng kanyang mga pangarap.
Nakasalalay pa rin sa taumbayan kung anong landas ang kanyang tatahakin sa mga susunod na panahon.
Desisyon pa rin aniya ng publiko ang mangingibabaw na dapat na galangin at kilalanin.
Samantala, sinabi rin ni Moreno na pinakinggan ng SC ang mandato ng Manilenyo nang ibasura ang disqualification case laban kay Estrada. Bindikasyon ito para kay Estrada na inihalal sa isang malinis at parehas na halalan.
Mas pagtutuunan nila ngayon ng pansin ang mga pangangailangan pa ng mga Manilenyo at masolusyunan ang suliranin ng mga taga-lungsod. (Doris Franche-Borja)
- Latest