Leeg ng kelot, pigtas sa taga
MANILA, Philippines - Mistulang kinatay na baboy ang isang 43-anyos na lalaking natagpuang walang buhay, naliligo sa sariling dugo at halos mapigtas ang leeg bukod pa sa tadtad ng taga ang katawan sa Sampaloc market sa Maynila sa mismong araw ng Pasko (Disyembre 25).
Kinilala ni SPO1 Rommel del Rosario, ng Manila Police District-Homicide Section, ang biktimang si Daniel Dwyer Valeros, ng Lardizabal St., Sampaloc, Maynila.
Isang kinilala lamang sa alyas na Bitoy, ang sinasabing responsable sa pananaga sa biktima.
Sa ulat, dakong alas-5:10 ng hapon nang madiskubre ang duguan at nakalugmok na biktima sa Sampaloc market sa may Guidote St., panulukan ng Bustillos St., sa Sampaloc.
Sa pagsusuri ng Scene of the Crime Operatives (SOCO), hindi pa nagtatagal na isinagawa ang krimen dahil inabutan pa nilang umaagwas ang dugo mula sa mga sugat ng biktima.
Bago umano matagpuang patay ang biktima, huli itong nakitang nakikipag-inuman sa grupo ng kalalakihan sa lugar.
Maaaring may nakaalitan ang biktima sa gitna ng inuman at posibleng kargador o helper sa palengke ang suspek kaya nakakuha ito ng patalim na ginamit sa pananaga.
- Latest
