Tauhan ng MTPB, towing company inireklamo ng Koreano
MANILA, Philippines - Nahaharap sa kasong robbery ang mga tauhan ng Manila Traffic and Parking Bureau (MTPB) at towing personnel sa reklamong inihain ng isang motoristang Koreano na nawalan ng P250 libo nang pakialaman ang kanyang Sports Utility Vehicle (SUV) at hatakin ng towing truck habang nakaparada sa bahagi ng Mabini St., Malate, Maynila, kamakalawa ng hapon.
Sa reklamo sa MPD-General Assignment and Investigation Section, isinalaysay ng biktimang si Minjin Park, 38, nanunuluyan sa Tambo, Parañaque, na dakong alas- 3:10 ng hapon noong Huwebes ay bigla na lamang hinatak ang kanyang SUV na nakaparada sa may Mabini St., gayung pansamantala lamang siyang humimpil dahil nagpalit lamang siya ng dolyar sa Edzen money changer na nasa tapat lamang.
Nakita umano ng biktima ang paghatak ng kanyang sasakyan ng may 8 katao, na sa huli ay kinilalang sina Rodrigo Villena, Elson Minador, Christopher Boradi, Arnel Neves, Lyci Ico, David John Calixto, Roy Reyes, at isa pang hindi nakikilalang towing personnel.
Nagpalit siya ng dolyar sa peso cash na inilagay niya sa bag na nasa kotse sa halagang P250,000 na nawala.
Iimbestigahan ng MPD-GAIS ang insidente at nagpakuha na rin ng kopya ng nakunan ng closed circuit television (CCTV) na nakakabit sa lugar upang makita ang kaganapan sa oras na itino-tow ang SUV ng biktima.
Bukod pa sa nagreklamong Koreano, lumutang din ang truck driver na si Mauro Montano, empleyado ng Watch Cargo Movers laban sa mga nasabing towing MTPB na bumugbog sa kanya sa tapat ng Adamson University, sa Ermita, Maynila dakong alas- 10:30 ng gabi, kamakalawa nang pumalag sa itino-tow na truck.
- Latest