All out war vs pusher na parak dineklara ni Erap
MANILA, Philippines – Nagdeklara na ng all out war si Manila Mayor Joseph Estrada laban sa mga pulis na nasasangkot ngayon sa ipinagbabawal na gamot.
Ang deklarasyon ni Estrada ay hamon din kay Manila Police District director Sr. Supt. Rolando Nana na linisin ang kanyang hanay laban sa paglaganap ng ipinagbabawal na gamot na may malaking epekto sa mga sibilyan lalo na sa mga kabataan.
Sinabi ni Estrada sa isang panayam na walang puwang sa Maynila ang droga na isa sa mga pinatututukan niya kay Nana. Nakababahala anya na maging ang mga kabataan ay nalululong na rin sa masamang bisyo kung saan ang mga pulis pa ang kadalasang gumagamit at nagsisilbing mga ‘tulak’.
Ayon kay Estrada, ang pagiging drug free ng Maynila ay isang karangalan dahil indikasyon lamang ito na nasa husto at maayos na pamamalakad ng mga namamahala dito.
Sinabi naman ni Nana na sa kasalukuyan ay wala pa silang natutukoy na mga pulis na sangkot sa ipinagbabawal na gamot bagaman nagsasagawa na siya ng mga anti-illegal drug campaign at monitoring sa mga lugar na pinaniniwalaang talamak ang droga.
Wala ring gagawing anumang compromise ang kapulisan laban sa ipinagbabawal na gamot.
Aniya, naglabas na rin siya ng kautusan sa kanyang mga station commanders na linisin ang kanilang mga nasasakupan. Hindi rin umano siya mag-aatubiling sibakin ang sinumang pulis na masasangkot sa droga.
Bagama’t nasa proseso pa sila ng evaluation sa estado ng mga pulis, sinabi ni Nana na mahigpit ang kanyang paalala sa kanyang mga tauhan na sundin lamang ang kanilang sinumpaang tungkulin upang hindi makalabag ng batas.
- Latest