Trike driver butas ang noo sa lalaking pasahero
MANILA, Philippines - Butas ang noo ng isang 37-anyos na tricycle driver matapos barilin ng kanyang pasahero sa Parola Compound, Tondo, Maynila, kamakalawa ng hapon.
Naisugod pa sa Gat Andres Bonifacio Memorial Medical Center (GABMMC) pero hindi na umabot pang buhay ang biktimang si Anthony Sibo, binata, residente ng Lecheros St., Tondo, Manila. Nagsasagawa pa ng imbestigasyon para matukoy ang gunman na responsable sa pamamaril.
Sa ulat ni PO3 Marlon San Pedro ng Manila Police District-Homicide Section, naganap ang insidente dakong alas-2:45 ng hapon nitong Biyernes sa ICTSI Road, South Access, Area A, Gate 6, Parola Compound, Tondo, Manila.
Sa inisyal na pagsisiyasat, bandang alas- 2:00 ng hapon nang sumakay sa tricycle na minamaneho ng biktima sa bahagi ng Divisoria market ang lalaking pasahero na nagpahatid sa Parola Compound, at nagsabing may susunduin lamang sa lugar at babalik din sa Divisoria.
Subalit sa pagsapit sa nasabing lugar, agad na pinaputukan ng suspect ang biktima sa noo at saka mabilis na tumakas papasok umano sa Gate 6 ng Parola Compound.
Blangko pa ang pulisya sa motibo sa naganap na krimen.
- Latest
