Kasong kriminal vs Derek Ramsay, isinampa ng misis
MANILA, Philippines - Suportang nararapat lamang na ibigay sa kanilang 11-anyos na anak na lalaki ang kanyang giit sa aktor na si Derek Ramsay at wala na siyang ibang hinahabol pa rito.
Ito ang ipinahayag ni Mary Christine Jolly, 36, makaraang humarap kahapon sa mga mediamen sa lungsod ng Makati.
Si Mary ay nagsampa ng kasong paglabag sa Republic Act No. 9262 o kilala sa tawag na Anti-Violence Against Women and Their Children Act of 2004 sa Makati City Prosecutor’s Office laban sa naturang aktor.
Bilang dati ring modelo, pinili ni Mary na huwag magsalita sa matagal na panahon para hindi maapektuhan ang career ng asawa sa pagiging aktor at bilang isa ring modelo.
Gayunman, nang tumanggi ang aktor na tuparin maging ang kanyang obligasyon sa kanilang anak, wala umano siyang magagawa kundi gawin ang dapat.
Sa kanyang iniharap na kaso laban sa aktor, inakusahan ni Mary ang kanyang asawa ng ‘committing psychological violence’ laban sa kanya at sa kanilang anak sa pamamagitan ng pisikal, psychological at economic abuses sa loob ng maraming taon.
Ayon pa sa misis ng aktor, sinabi nitong 11-taon niyang tiniis at mag-isang pinalaki ang kanilang anak na wala man lamang ibinigay o inalok na suporta ang asawa.
Ngayon na lamang niya umano napag-isip-isip na panahon na upang ipaglaban ang karapatan ng kanyang anak at ang obligasyon dito ng aktor bilang ama.
Apektado na umano ang kanilang anak dahil sa kapabayaan ng ama at panahon nang ibigay nito ang nararapat na atensyon at pagmamahal dito.
Bukod pa ito sa tulong pinansiyal na nakabatay aniya sa pangangailangan ng bata at sa kakayanang pinansiyal ng aktor.
Ibinunyag ni Mary, na noong 2011 pa umano niya unang nilapitan ang aktor para sa suporta sa kanilang anak, ngunit binalewala lamang ito ng huli.
Taong 2001 sila nagkakilala ng naturang aktor na noon ay isang aspiring MTV Asia DJ. Nagpakasal umano sila noong April 2002 sa Balagtas, Bulacan kung saan ang alkalde na nagkasal sa kanila ay tiyuhin ng kaibigan ng aktor na nagsilbi ring witness sa seremonya.
Subalit, noong Setyembre 2002 ay naghiwalay sila dahil sa pambababae at ginagawa nitong pang-aabuso sa kanya.
Matapos ang hiwalayan ay doon nadiskubre ni Mary ang kanyang pagbubuntis na binanggit din niya sa aktor sa pamamagitan ng kanilang kaibigan pero binalewala lamang ito ng huli.
“This is not about me. This is about my son, who wants nothing more than assert his rights as a child from his father,” dagdag pa ni Mary.
- Latest