SONA sinabayan ng protesta
MANILA, Philippines - Sa kabila ng mga pagbuhos ng ulan, hindi nagpatinag ang libu-libong raliyista na sumugod sa Batasan complex para magsagawa ng programa kasabay ng State of the Nation Address (SONA) ng Pangulong Benigno Aquino III kahapon.
Tinangka rin ng mga raliyista na lumusot sa barikada ng pulisya sa gitna nang pagsasalita ng Pangulo sa SONA, pero binomba sila ng tubig ng mga awtoridad.
Alas-3 ng madaling-araw ay sinimulan na ng mga grupong magmartsa ang mga militante patungong Commonwealth Avenue bitbit ang kanilang mga placard, streamers at effigy na naglalaman ng salitang tungkol sa kurapsyon at pagpapahirap sa bayan at pagpapatalsik sa Pangulo sa puwesto.
Kasunod nito, ay nagsipagdatingan ang mga magsasaka buhat sa Southern Tagalog at sama-samang inokupa ang buong eastbound lane ng Feria Road kung saan sila nagsimulang magprograma gamit ang isang trak na nilagyan ng entablado, ganap na alas-9 ng umaga.
Kasama rin sa kilos protesta ang kawani ng gobyerno mula sa People’s Television (PTV)-4, IBC 13, at RPN 9. Mga miyembro ng Kilusang Mayo Uno, Kabataang partylist, migrante, bayan muna at iba pa.
Tulad ng inaasahan, hindi na nagawang makalapit ng mga raliyista malapit sa Batasan complex bunga ng mga inilatag na barikada ng awtoridad, may 100 metro buhat sa pagdarausan ng SONA.
Alas-12 ng tanghali, isang effigy ng Pangulo ang sinunog ng grupo, bilang panimula sa kanilang pagkilos, kasabay nito ang pagbuhos ng malakas na ulan pero hindi nagpatinag ang mga ito.
Samantala, nagkaroon din ng pagtitipun-tipon ang kasapi ng Pinagkaisang Samahan ng mga Tsuper at Operators Nationwide (PISTON) sa harap ng Land Transportation Office at Land Transportation Franchising and Regulatory Board (LTFRB) at nagdaos ng “state of the drivers address” (SODA).
Matapos ang programa, nagtungo na rin ang grupo sa Commonwealth Avenue at nakihalo sa iba pang militanteng grupo kung saan sila nagsimula ng kanilang programa at sariling bersyon ng SONA.
Magmula St. Peters Church hanggang Ever Gotesco ang naging sakop ng mga militante para magsagawa ng kanilang mga programa. Dito nila pinagsama-sama ang kanilang mga hinaing laban sa pamahalaan sa pamamagitan ng improvised na entablado na nakakabit sa isang 10 wheeler truck.
Sa hanay ng Philippine National Police, doble ang naging paghahanda sa sitwasyon dahil apat na hanay ng barikada ang kanilang inilagay sa kahabaan ng Commonwealth Avenue. Bukod ang mga barbwire na ikinabit sa barikada, mga container van, at mga truck ng bumbero at mga pulutong na puwersa ng Quezon City Police District na may bitbit na pananggalang.
Ayon kay Senior Insp. Maricar Taqueban, tagapagsalita ng Quezon City Police District, umabot sa 7, 500 militante buhat sa iba’t-ibang samahan ang nagsama-sama para magsagawa ng kilos protesta sa kahabaan ng Commonwealth.
Habang nasa 10,000 puwersa ng PNP ang nagbabantay sa kanilang hanay.
Alas-4:45 ng hapon sa kalagitnaan ng pagsasalita ng Pangulo ay sinimulan ng mga militante ang pagsunog sa pinakamalaking effigy.
Habang naglalagablab ang effigy ay pinapaikutan naman ito ng mga militante na sumisigaw ng pagtuligsa sa kawalang aksyon umano ng Pangulo sa kalagayan ng mahihirap na mamamayan.
Alas-5 ng hapon, tinangka ng mga militanteng makausad sa barikada ng mga pulis, kung saan nabuwag ng mga ito ang barikada ng pulis sa Ever Gotesco, subalit pagsapit sa barikadang itinayo sa Commonwealth, ilang metro ang layo sa Batasan complex ay binomba sila ng mga tubig ng mga bumbero buhat sa Bureau of Fire Protection (BFP).
- Latest