3 paslit patay sa lunod

MANILA, Philippines – Patay ang tatlong batang lalaking magkakapatid matapos na lamunin ng malakas na agos habang naglalaba sa ilog sa Brgy. Saksak, Aloguinsan, Cebu kamakalawa. Kinilala ang mga nasawing biktima na sina Rod Mar Flores, 8; Reymart, 6 at Rafael, 4. Bandang ala-1 ng hapon kamakalawa ng matagpuan ang bangkay ng mga biktima sa ilog ng Brgy. Saksak matapos lumutang ilang oras pagkaraang malunod sa insidente. Base sa ulat ng pulisya, nagtungo ang magkakapatid sa ilog para maglaba ng kanilang mga damit kaugnay ng pagbubukas ng klase nang mapagawi sa malalim na bahagi na tinatayang nasa anim na talampakan. Unang nalunod ang 4-anyos na sinaklolohan naman ng kanyang mga kuya, gayunman pawang nilamon sila ng malakas na agos sa ilog. Nabatid na dakong alas- 11 ng tanghali ng utusan ng kanilang 35-anyos na inang si Maribeth ang mga bata na maglaba dahilan bagong panganak ito na humantong sa trahedya.