2 karnaper dakma

MANILA, Philippines - Sa loob lamang ng 24-oras, nabawi ng mga operatiba ng pulisya ang kinarnap na sasakyan kasunod ng pagkakaaresto sa dalawang notoryus na karnaper sa inilatag na checkpoint sa bayan ng Calatagan, Batangas kahapon ng umaga. Batay sa ulat na nakarating sa Camp Crame, bandang  alas-7 ng umaga nang maispatan ang nakaalarmang taxi na Toyota Vios habang buma­bagtas sa checkpoint sa Brgy. Balibago, Calatagan. Hindi na nakapanlaban ang mga suspek na sina Hernai Moises at Jake Gonzales matapos makorner ng mga operatiba na nakatanggap ng ulat sa nakaalarmang sasakyan na kinarnap sa Pasay City noong Linggo (Hunyo 3). Nasamsam sa mga suspek ang isang cal. 38 revolver na may anim na bala at dalawang plastic sachet ng shabu.