Mag-utol nalunod sa tubig-baha

MANILA, Philippines - Masyadong napaaga ang salubong ni kamatayan sa mag-utol na bata matapos nitong malunod sa tubig-baha sa pananalasa ng Bagyong Ambo sa bayan ng Busuanga, Palawan kahapon. Sa ulat ng Civil Defense ng Region 4-B, nakilala ang mga biktima na sina Princess Beyonce Abrera, 2; at Shaoun Morie, 4, kapwa nakatira sa Barangay Sagrada sa nasabing bayan. Unang natagpuan ang bangkay ni Princess Beyonce bandang alas-11 ng umaga habang ala-una naman ng hapon nang mamataan ang bangkay ni Shaoun Morie may ilang metro ang layo sa kanilang bahay. Base sa ulat, huling namataang buhay ang mag-utol na naglalaro bandang alas-8 ng umaga sa likurang bahagi ng kanilang bahay malapit sa ilog sa Sitio Giwid.