P8-M marijuana nasamsam

MANILA, Philippines - Umaabot sa P 8 milyong halaga ng marijuana ang nasamsam matapos salakayin ng mga sundalo ng Phil. Marines ang malawak na plantasyon sa Barangay Gulangan sa bayan ng Maimbung, Sulu noong Biyernes ng hapon. Bandang alas- 5 ng hapon nang lusubin ng raiding team ng Marine Battalion Landing Team 2 at 3rd Marine Brigade ang plantasyon ng marijuana sa magubat na bahagi ng nasabing lugar. Gayon pa man, walang inabutang namamahala sa plantasyon ng bulto ng marijuana na sinasabing nakatunog sa pagsalakay kaya nagsitakas. Nakumpiska sa lugar ang bultu-bulto puno at binhi ng marijuana na aabot sa P 8 milyon.