2 Indonesian na bihag ng Sayyaf pinalaya
MANILA, Philippines — Dalawang tripulanteng Indonesian na bihag ng mga bandidong Abu Sayyaf Group (ASG) ang pinalaya nitong Biyernes ng gabi sa isang liblib na lugar sa Sulu.
Kinilala ang mga pinakawalang hostage na sina La Utu bin La Raali at La Hadi La Edi.
Sa ulat ni Sulu Provincial Police Office (PPO) Director P/Sr. Supt. Mario Buyucan, dakong alas-7:30 ng gabi nang palayain ng mga kidnappers ang dalawang dayuhan.
Ang mga hostages ay itinurn-over ng mga emisaryo sa tahanan ni dating Sulu Gov. Abdusakur “Sakur’ Tan Sr. sa Brgy. Asturias, Jolo ng lalawigan.
Nang matanggap ang impormasyon ay agad naman itong sinundo ng tropa ng militar sa pangunguna ni Joint Task Force (JTF) Sulu Commander Brig. Gen. Cirilito Sobejana.
Nabatid na ang mga biktima ay kabilang sa mga tripulanteng binihag ng mga bandido matapos na harangin ang M/V Ching Kai Ling fishing vessel noong Nobyembre 5, 2016 sa pagitan ng karagatan ng Pegasus Reef at Kuala Kinatabangan malapit sa Taganak Island sa Tawi-Tawi.
- Latest
