2 parak nagsilbi ng warrant, sugatan sa shootout

MANILA, Philippines — Dalawang pulis ang nasugatan matapos na manlaban at makipagbarilan ang isang mister na wanted sa kasong pagpatay habang isinisilbi ang warrant of arrest laban sa kanya na nagawa pa nitong ihostage ang sariling misis sa Brgy. Napsan, Puerto Princesa City, Palawan nitong Biyernes ng umaga.

Kapwa isinugod sa Palawan Adventist Hospital ng nagrespondeng ambulansya ang mga nasugatang parak na sina SPO2 Habil Insail at PO1 Jasper Ian Cacho; pawang aktibong kasapi ng City Mobile Force Company.

Ayon kay Police Regional Office (PRO) IV-B Spokesperson P/Supt. Imelda Tolentino, dakong alas-6 ng umaga bitbit ng dalawang pulis kasama ang mga elemento ng 3^rd Marine Brigade ang warrant of arrest at nagtungo sa Sitio Pagasa, Brgy. Napsan ng lungsod upang isilbi ito sa suspek na si Fernan Ramsa, 56 anyos,  wanted sa kasong murder .

Gayunman, nang matanawan ng suspek na paparating na ang mga pulis ay agad nitong hinostage ang kanyang misis na ginamit na pananggalang sa mga awtoridad at saka pinaputukan ang arresting team.

Nasugatan sa insidente ang dalawang pulis habang mabilis namang nagtatakbo patakas ang suspek na nasugatan sa paa sa pakikipagbarilan sa mga awtoridad.

Patuloy naman ang pagtugis ng mga awtoridad laban sa nakatakas na suspek.