Abu terrorist, sakote
MANILA, Philippines — Bumagsak sa kamay ng pulisya ang 45-anyos na miyembro ng teroristang Abu Sayyaf Group na sangkot sa kidnap-for-ransom sa isinagawang police operation sa Plaza Pershing, Zamboanga City sa Zamboanga del Sur noong Miyerkules ng umaga.
Kinilala ang nasakoteng terorista na si Puyat Saiyadi na may mga alyas Abubakar Diniri, Isikandar Saiyadi, at Alyas Puyat Talib Saiyadi ng Pata Island, Jolo, Sulu.
Sa police report na nakarating sa Camp Crame, dakong alas -10 ng umaga nang masakote ng mga operatiba ng Intelligence Section ng Zamboanga City Police Station 4 ang suspek na gumagala sa nasabing plaza.
Inaresto ang suspek sa bisa ng warrant of arrest sa kasong kidnapping with serious Illegal detention na inisyu ni Judge Leo Jay Principe ng Regional Trial Court (RTC) Branch 1 sa Isabela, Basilan.
Base sa tala ng pulisya, ang suspek ay sangkot sa pagdukot sa sampung manggagawa ng Golden Harvest Plantation sa Tairan, Lantawan, Basilan noong Hulyo 11, 2001.
- Latest