Kagawad, magsasaka itinumba

NORTH COTABATO, Philippines — Napatay ang beteranong barangay kagawad at ang 37-anyos na magsasaka sa magkahiwalay na pamamaril sa dalawang bayan sa lalawigan ng North Cotabato kahapon at noong linggo ng umaga. Base sa police report, patungo sana sa kasalan ang nagmomotorsiklong si Kagawad Sukarno Samama ng Barangay Olandang nang ratratin ng riding-in-tandem assassins pagsapit sa bisinidad ng Barangay Nabalawag sa bayan ng Midsayap. Samantala, napatay din ang magsasakang si Michael Condes Locario matapos itong pagbabarilin ng mga teroristang New People’s Army (NPA) sa Sitio Tinanan, Barangay Malibatuan sa bayan ng Arakan, North Cotabato. Sinisilip ng pulisya ang anggulong inakusahan ng NPA ang biktima na asset ng military kaya pinatahimik.