Ambush: Kalihim ng governor todas, mister sugatan
NUEVA ECIJA, Philippines — Napaslang ang 38-anyos na kalihim ni Nueva Ecija Governor Czarina “Cherry” Umali habang sugatan naman ang kanyang mister makaraang pagbabarilin ng motorcycle-riding assassins sa gasolinahan sa Barangay Marcos, bayan ng Talavera, Nueva Ecija noong Linggo ng gabi.
Kinilala ang napatay na si Mary Anne Hernandez y Guevarra, nakatira sa Zone 6, Barangay Pag-asa sa nasabing bayan at personal secretary ni Gov. Cherry Umali.
Ginagamot naman sa hindi tinukoy na pagamutan ang negosyanteng mister ni Mary Anne na si Carlito Hernandez y Domingo, 43.
Base sa police report na nakarating kay P/Senior Supt. Eliseo Tanding, Nueva Ecija police provincial director, nabatid na bandang alas-6:30 ng gabi ay magkasama sa SUV (DOJ826) ang mag-asawa habang nagpapagasolina nang lapitan at ratratin ng tandem gunmen.
Nagtamo ng mga tama ng bala ng cal. 45 pistol si Mary Anne habang tinamaan din ang mister nito habang masuwerte namang nakaligtas ang kanilang dalawang anak at kasambahay na nakaupo sa hulihan ng sasakyan.
Nangangalap ng footages sa mga closed-circuit television (CCTV) camera sa kahabaan ng Maharlika Highway at mga kalapit na barangay na sinasabing dinaanan ng mag-asawa upang makatulong sa paglutas sa kaso.
- Latest