15-anyos totoy kisay sa kuryente

QUEZON  , Philippines  —  Maagang sinalubong ni kamatayan ang 15-anyos na totoy makaraang matapakan ang talop na kable ng kuryente sa madamong bahagi sa Sitio Daungan Pari, Barangay Binahaan sa bayan ng Pagbilao, Quezon kamakalawa ng umaga. Sa police report na nakarating kay P/Chief Insp. Rizaldy Merene, chief of police, kinilala ang biktima na si Bel Christian Panaligan, Grade 9 at residente ng nasabing barangay. Base sa imbestigasyon, nakayapak na naglalakad ang biktima sa damuhan nang maapakan nito ang talop na secondary wire ng kuryente na nakasalampak. Kaagad na nagkikisay ang biktima dahil sa malakas na boltahe ng kuryenteng pumasok sa kanyang katawan. Pinag-aaralan na ng mga kaanak ng biktima kung sasampahan ng kaukulang kaso ang kompanya dahil sa kapabayaan.