Pulis pumalag sa aresto, inutas ng sikyu
MANILA, Philippines — Bulagta ang 36-anyos na pulis makaraang pagbabarilin ng security guard na kanyang nakaalitan sa beach resort sa bayan ng Hinigaran, Negros Occidental kamakalawa.
Kinilala ang napatay na si PO2 Britches Talapiero ng Bacolod City Police Office Station 5 at naninirahan sa Barangay Granada sa Bacolod City.
Boluntaryo namang sumuko ang suspek na si Joey Belinario, security guard sa Canonoy Beach Resort sa Barangay Miranda sa nabanggit na bayan.
Sa police report na nakarating sa Camp Crame, sumiklab ang komosyon sa pagitan ng grupo ng nakababatang kapatid ni PO2 Talapiero at Leslie John Dojillo na nagkahabulan pa.
Bunga nito ay nabaril naman ng nasabing pulis si Dojillo ng dalawang beses kung saan hinabol naman ito ng mga rumespondeng security guard sa nasabing beach resort.
Gayunman, nang tangkain ng suspek na arestuhin si PO2 Talapiero ay tinangka umano nitong kunin ang baril.
Dito na pinagbabarilin ng suspek ang likurang bahagi ng pulis gamit ang 12 gauge shotgun.
Isinugod naman sa Hinigaran Medical Clinic ang biktima subalit idineklarang patay.
Nahaharap ngayon sa kasong kriminal ang guwardiya na humihimas na ng rehas na bakal sa himpilan ng pulisya.
- Latest