Driver ng Partas bus kakasuhan
MANILA, Philippines – Patung-patong na kaso ang isasampa laban sa driver ng Partas bus na nakabanggaan ang isang jeep sa lalawigan ng La Union na ikinasawi ng 20 katao nitong Pasko.
Sinabi ni Agoo deputy police chief Senior Insp. Eugene Balagot na kasong reckless imprudence resulting in multiple homicide and damage to property and physical injury ang ihahain laban kay Rodel Sadac na kasalukuyang nasa kustodiya nila.
Hinihintay naman ng mga awtoridad ang resulta ng autopsy sa driver ng jeep na si Roland Perez upang malaman kung nakainom ba siya nang mangyari ang aksidente.
BASAHIN: 20 patay sa salpukan ng bus, jeep sa La Union
Lumabas sa imbestigasyon na kasalanan ng driver ng jeep ang aksidente nang mag-overtake ito at kinuha ang lane ng bus sa Barangay San Jose Sur.
Patungo sanang Manaog, Pangasinan ang jeep upang makapagsimba at dumalo sa family gathering.
Sinuspinde naman ng Land Transportation Franchising and Regulatory Board (LTFRB) ng 30-araw ang pitong bus ng Partas matapos hindi makuha ang kuha ng dash camera na makapagpapakita nang aksidente.
“The violation of Partas why it was issued a suspension order is for its failure to comply with the directive of the board considering that 36 hours have passed since the road crash,” pahayag ni LTFRB board member and spokesperson Aileen Lizada.
- Latest
