2 suspek sa student slay, kinasuhan na

TUGUEGARAO CITY, Cagayan, Philippines — Pormal na kinasuhan ng pulisya ang dalawang suspek sa brutal na pagpatay sa isang 19 anyos na computer science student noong Hulyo matapos silang matukoy ng ilang saksi sa Ilagan City, Isabela kamakalawa. Kinilala ni P/Supt. Ariel Quilang, hepe ng Ilagan City police station, ang mga suspek na kinasuhan ng murder sa Department of Justice ay sina Rosendo Sison at Bryan Cabanet, kapwa nakatira sa nasabing lungsod. Base sa police report, ang mga suspek ay itinuturong pumatay kay Dhana Marikit Dinero na niratrat saka itinapon sa gilid ng kalsada sa Barangay San Ignacio. Isa sa anggulong sinisilip ng pulisya ay love triangle ang pangunahing motibo ng dalawa sa pamamaslang sa dalaga na sinasabing maraming manliligaw.