14-anyos mag-aaral kisay sa kuryente

QUEZON, Philippines — Hindi na makadadalo sa class Christmas party ang 14-anyos na dalagita matapos itong makuryente sa nakalawit na talop na kable sa kuryente sa Barangay Putol sa bayan ng Dolores, Quezon kamakalawa ng umaga. Idineklarang patay sa ospital dahil sa lakas ng boltaheng pumasok sa  katawan ng biktimang si Jocelyn Escovidal, estudyante ng Dagatan National High School at residente ng nasabing barangay. Ayon sa ulat ng pulisya, bandang alas-6 ng umaga ay naglalakad ang biktimang patungo sa paaralan nang mapahawak ito sa puno na lingid sa kanyang kaalaman ay may nakalawit na talop na kable na dinadaluyan na nasa may 20,000 boltahe ng kuryente. Nang aksidenteng nahawakan ng biktima ang kable ay agad itong nagkikisay at bumulagta. Mabilis namang rumesponde ang mga tauhan ng BFP sa tulong ng ilang residente upang isalba ang buhay ng biktima subalit nalagutan din ito ng hininga.