Trike salpok sa bus, 3 utas
MANILA, Philippines — Dead-on-the-spot ang tatlong katao habang dalawa naman ang malubhang sugatan makaraang sumalpok ang sinasakyan nilang tricycle sa kasalubong na bus sa kahabaan ng national highway sa Brgy.San Isidro sa bayan ng Sto.Domingo, Legaspi City, Albay noong Huwebes ng gabi.
Bunsod ng matinding pagkakabangga ng trike sa kasalubong na bus, lasug-lasog ang katawan ng mga nasawing biktima na kinilalang sina Jheo Gestiada, 21-anyos, driver ng tricycle at mga pasaherong si Paolo Vicuna,16-anyos at Johnny Eusebio, 21 taong gulang.
Kasalukuyang ginagamot sa Bicol Regional Training and Teaching Hospital ang dalawa pang sugatang pasahero na sina Michael Vicuna,19, at Reymark Logronio,15, lahat sila ay residente ng Brgy. Buragwis, Legazpi City.
Batay sa ulat na nakarating sa Camp Gen.Simeon Ola, dakong alas-10:15 ng gabi, nang pauwi ang mga biktima galing ng Tabaco City lulan ng tricycle na minamaneho ni Gestiada nang maganap ang insidente.
Pagdating umano sa palusong at pakurbang bahagi ng kalsada ay nawalan ng kontrol sa manibela si Gestiada at inokupa ang kabilang linya at nakasalubong ang RMB Bus (WDZ-193) na minamaneho ni Ramon Pellosis, 43, residente ng Brgy. San Lorenzo,Tabaco City dahilan para magbanggaan ang dalawang sasakyan.
Sa lakas ng pagkakabanga ay tumilapon lahat ng sakay ng tricycle at humampas sa sementadong highway.
Posibleng lasing umano si Gestiada bago maganap ang naturang salpukan.
Sumuko naman ang driver ng bus sa mga rumespondeng pulis at sinampahan ng kaukulang mga kaso.
- Latest