2 anak gulpi-sarado sa ama
MANILA, Philippines — Bagsak-kalaboso ang 39-anyos na amang seaman matapos itong ireklamo ng kaniyang misis kaugnay sa pambubugbog sa dalawa nilang anak na lalaki sa Aurora Hill, Baguio City kamakalawa ng hapon.
Kinilala ang suspek na si Ruel Cayaban Oller ng No. 40 Bayan Park Village sa nasabing lungsod.
Samantala, kapwa nagtamo ng mga sugat at galos sa katawan ang mga anak na sina Paul Russel Oller, 18; at Patrick Oller, 19.
Sa ulat ng Cordillera Police na naisumite sa Camp Crame, naitala ang insidente dakong ala-1:20 ng hapon kung saan nag-aaway ang suspek at misis nito na sinasaktan ng una nang umawat ang dalawa nitong anak na lalaki.
Gayunman, pinagbalingan ng suspek ang dalawang anak na kapwa ginulpi nito hanggang sa manlata na ang dalawang biktima nang tigilan nito.
Hindi naman nagdalawang isip ang misis na ipagharap ng reklamo ang asawa dahil sa pananakit sa dalawa nilang anak.
Nahaharap ngayon sa kasong kriminal ang nasabing mister na kasalukuyang humihimas ng rehas na bakal.
- Latest