Ambush: 2 opisyal ng barangay utas
MANILA, Philippines — Dalawang opisyal ng barangay ang napatay habang sugatan naman ang barangay chairman makaraang tambangan ng mga hindi kilalang kalalakihan sa bisinidad ng Barangay Annanuman sa bayan ng San Pablo, Isabela kahapon ng umaga.
Kinilala ni P/Supt. Ronald Laggui, spokesman ng Isabela Police ang mga napatay na sina Bonifacio Lumabi, 48, barangay tanod at Rey Mabborang, 42, barangay treasurer.
Sugatan naman si Chairman Bricio Gammaru, 36, ng Barangay Dalena sa nasabing bayan.
Bandang alas-8 ng umaga nang maitala ang pananambang sa mga biktima sa kahabaan ng national highway sa nabanggit na barangay.
Ayon sa imbestigasyon, ang mga biktima ay lulan ng asul na owner-type jeep (UHK 272) na patungong Cabagan, Isabela nang tambangan ng mga armadong kalalakihan pagsapit sa nasabing lugar.
Sinisilip naman ang anggulong politika ang isa sa motibo sa pananambang dahil nalalapit na ang barangay elections sa 2018.
- Latest
