Councilor niratrat ng NPA, todas

MANILA, Philippines — Pinabulagta ang 58-anyos na barangay councilor  matapos itong ratratin ng mga teroristang New People’s Army sa loob ng bahay nito sa Barangay Poblacion, bayan ng Dimataling, Zamboanga del Sur noong Lunes ng gabi. Kinilala ang biktima na si Arao Bonga, peace and order chairman at residente ng Purok 9-A sa nasabing barangay. Sa police report na nakarating sa Camp Crame, kasalukuyang nanonood ng telebisyon ang biktima sa tabi ng bintana ng bahay sa may sala nang biglang sumulpot ang armadong kalalakihan saka pinagbabaril ito. Narekober sa crime scene ang mga basyo ng bala ang M16 Armalite rifle habang patuloy naman ang pagsisiyasat.