Kaso ng nakawan sa Isabela, bumaba

TUGUEGARAO CITY, Cagayan  , Philippines  —  Bumaba ng halos 30 porsiyento ang insidente ng pagnanakaw sa Isabela nitong nakaraang ikatlong quarter ng taon kumpara sa parehong panahon noong 2016, ayon sa pagsusuri ng pulisya kamakalawa. Sinabi ni P/Senior Supt. Reynaldo Garcia, Isabela police director, sa kaso na lamang ng robbery ay 115 insidente ang naitala noong 2016 kumpara sa 82 insidente ngayong 2017.?Sa carnaping ay may 102 insidenteng naitala noong 2016 habang 38 na lamang nitong taon.?Nabatid na bumaba ang insidente ng pagnanakaw kasunod ng pagpapa-igting ng pulisya ng kampanya laban sa droga kung saan ay sinasabing malaking bahagdan ng mga pagnanakaw ay bunsod ng epekto ng pagkakalulong sa droga ng mga suspek. Sinabi ni Garcia na nakahanda ang kapulisan na muling sumabak sa pagpapatupad ng operasyon laban sa droga ngayon at muli silang itinalaga ni Pangulong Duterte sa nasabing kampanya.