Admin officer ng alkalde, itinumba

TUGUEGARAO CITY, Cagayan, Philippines — Brutal na kamatayan ang sinapit ng 48-anyos na administrative officer ni Mayor Virgilio Valle matapos pagpapaluin ng mga hindi kilalang kalalakihan sa Barangay Sidaoen, Sta Cruz, Ilocos Sur kamakalawa. Sa police report na nakarating kay P/Senior Insp. Mark Odilon Lagman, hepe ng Sta. Cruz Police Station, basag ang bungo ng biktimang si Carlito Ramos nang matagpuan sa ilalim ng puno ng acacia dakong alas-7 ng umaga. Ayon sa ulat, kamuntikan nang himatayin ang mister na nakadiskubre sa bangkay ni Ramos na noon ay naudlot ang pag-ihi sa nasabing lugar. Nabatid na naghatid ng mga residenteng lulan ng dump truck ng munisipyo ang biktima sa Barangay Daligan para sa programa ng kapis­tahan ng bayan. Gayunman, lingid sa biktimang pauwi na kinagabihan ay nakaabang na ang mga hindi kilalang lalaki saka siya hinarang at pinatay sa palo.