2 senglot nagtagaan sa inuman

QUEZON  , Philippines  —   Nabahiran ng dugo ang masayang inuman ng magkakapitbahay makaraang magduwelo ang dalawang senglot na nagresulta ng pagkamatay ng isa at malubhang pagkakasugat ng isa pa kamakalawa ng gabi sa Barangay Bacong Ibaba sa bayan ng General Luna, Quezon. Nagmistulang kinatay na hayop dahil sa dami ng sugat sa katawan ang biktimang si Joey Laborde habang nasa ospital ang sugatang suspek na si Reymund Nemo, 29. Ayon sa pulisya, nag-iinuman ang dalawa at isa pang kapitbahay na si Petronio Bombita nang nauwi sa pagtatalo. Naghamunan umano ang dalawa na tapusin na lamang nila sa duwelo sa gulok ang away hanggang sa magtagaan at kapwa duguang bumulagta.