Lady trader dinedo sa karinderya
Sinusuri ng mga tauhan ng Scene of the Crime Operations (SOCO) ang ilang gamit ng lady trader matapos itong ratratin ng hindi kilalang lalaki sa Barangay Ibayo, bayan ng Marilao, Bulacan. Kuha ni Romeo “Boy” Cruz
BULACAN , Philippines — Napaslang ang 41-anyos na babaeng trader matapos itong ratratin ng hindi kilalang gunman habang bumibili ng pagkain sa karinderya sa Barangay Ibayo sa bayan ng Marilao, Bulacan noong Miyerkules ng umaga. Walong tama ng bala sa ulo at katawan ang tumapos sa buhay ni Ritz Sanchez, may negosyong pagpapautang at residente ng Barangay Saog sa nasabing bayan. Sa imbestigasyon ni PO2 Rodel Alcantara, bumibili ng pagkain sa karinderya ang biktima nang lapitan at pagbabarilin dakong alas-10:35 ng umaga. Narekober ng mga tauhan ng Scene of the Crime Operations (SOCO) ang anim na basyo ng bala at ng cal. 9mm pistol. Nabatid na may business partner na babae ang biktima na sinasabing hindi naire-remit ang nakolektang perang pautang. Napag-alamang inilagay pa ng biktima sa kanyang Facebook account ang maling gawain ng kasosyong babae saka nagpa-police blotter.
- Latest
