Naghamon ng suntukan, tinodas

LEGAZPI CITY, Albay  , Philippines  —  Kamatayan ang sinapit ng 40-anyos na  senglot matapos itong pagsasaksakin ng lalaking kanyang hinamon nang suntukan sa Barangay Sinibaran sa bayan ng Matnog, Sorsogon kamakalawa ng hapon. Naisugod sa Matnog Medicare Hospital subalit idineklarang patay ang biktimang si Dadivas Siody ng Barangay Manurabi. Pinaghahanap naman ang suspek na si Honorato “Dagul” Espuelas ng nasabing barangay. Sa police report na nakarating sa Camp Simeon Ola, dakong alas-4: 30 ng hapon, nagwawala ang biktimang sinasabing lango sa alak nang makasalubong ang suspek kung saan hinamon ito nang suntukan. Gayunman, walang kibong lumapit ang suspek saka pinagsasaksak ang biktima. Lumalabas sa imbestigasyon na dati nang may alitan ang dalawa.