Notoryus wanted dedo sa shootout

LUCENA CITY, Quezon, Philippines — Patay ang sinasabing notoryus na miyembro ng organized crime group matapos itong makipagbarilan sa mga awtoridad sa Barangay Dalahican, Lucena City, Quezon kamakalawa ng hapon. Kinilala ni P/Supt. Reynaldo Maclang, chief of police, ang napatay na si Danny Medes na may alyas Danny Pingkaw ng Talag Group na sangkot sa serye ng gun-running, holdapan at drug pushing sa 1st at 2nd district sa Quezon. Ayon sa ulat, tinungo ng grupo ni P/Chief Insp. Ruben Ballera ang bahay ng suspek upang isilbi ang search warrant na inisyu ng korte. Gayunman, imbes na sumuko ay kumasa at nakipagbarilan si Medes sa mga awtoridad kaya napatay ito. Narekober sa encounter site ang cal. 45 pistol at ilang basyo ng bala.