2 patay, 2 sugatan sa killer bus

LEGAZPI CITY, Albay, Philippines — Dalawa-katao kabilang ang 60-anyos na dayuhan ang namatay habang dalawa naman ang nasugatan makaraang salpukin ng pampasaherong bus ang SUV sa kahabaan ng Maharlika Highway sa Purok Macapagal, Barangay Buhatan, Sorsogon City, Sorsogon kamakalawa ng hapon.

Kinilala ang mga namatay na sina Terry Lee Woodliff, driver ng SUV, tubong Wisconsin, USA at nakatira sa 6P Chilssy Tower 2, Muntinlupa City; at Rolando Hara Belardo, 47, ng Barangay Buhatan.

Patuloy namang ginagamot sa Sorsogon Provincial Hospital sina Analyn Esparrago Woodliff, 25; at Jessie Hebres,12. Sa ulat na nakarating sa Camp Simeon Ola, lulan ng SUV (AKA-4236) ang mga biktima nang biglang kumaliwa kaya nasalpok ng Elavil Bus (TXY-466) na minamaneho ni Rodolfo Abijay Jr., 52, ng Daet, Camarines Norte.

Sa lakas ng pagkakabangga nakaladkad pa nang ilang metro ng bus ang SUV ng mga biktima.