Kahera ng boutique utas sa holdaper
LUCENA CITY, Quezon , Philippines — Brutal na kamatayan ang sinapit ng 19-anyos na dalagang kahera sa boutique matapos itong holdapin ay sinaksak sa mukha ng hindi kilalang lalaki sa Barangay 3, Lucena City, Quezon kamakalawa ng hapon.
Nakatarak pa sa kaliwang mata ang patalim na ginamit sa pamamaslang sa biktimang si Vheanca Anne Punzalan, tubong Macalelon, Quezon at naninirahan sa Puerto del Mar Subdivision, Barangay Domoit sa nasabing lungsod.
Base sa police report na nakarating kay P/Supt. Reynaldo Maclang, natagpuan ang duguang katawan ng biktima makaraang pumasok ang may-ari ng Baby Owl Boutique na si Gloria Magadia.
Kaagad na ipinagbigay-alam ni Magadia sa pulisya ang nadiskubreng krimen kung saan natuklasang nawawala ang P1,500.00 cash na kinita ng nasabing shop. Pinaniniwalaang pumalag ang kahera sa mga holdaper kaya tinuluyang patayin habang patuloy naman ang pagsisiyasat.
- Latest