Mag-asawa pisak sa killer trak

LEGAZPI CITY, Albay, Philippines —  Kamatayan ang sinapit ng mag-asawang rider makaraang masalpok at magulungan ng 10-wheeler truck sa kahabaan ng Maharlika Highway sa Barangay Bagacay sa bayan ng Libmanan, Camarines Sur, kamakalawa ng tanghali. Kinilala ang mag-asawang biktima na sina Rodrigo Bragais at Luisa Bragais, mga nakatira sa Barangay Pamukid sa bayan ng San Fernando. Arestado naman ang drayber ng 10-wheeler truck na si Abeto Edem Jr., 43, ng Purok 4, San Pablo City, Laguna. Base sa police report na naisumite sa Camp Simeon Ola, pauwi na ang mag-asawang lulan ng motorsiklo nang suyurin ng trak (GKE330) ni Edem Jr. pagsapit sa nasabing lugar. Sa imbestigasyon ng pulisya, itinanggi ng driver ng trak na siya ang nakasalpok sa motorsiklo ng mag-asawa subalit idiniin naman siya ng mga nakasaksi sa sakuna.