30 armas ng Maute-ISIS nasabat
MANILA, Philippines — Aabot sa 30 armas ng Maute-ISIS na ginamit sa Marawi City ang nasabat ng Joint Task Force Ranao sa Lanao Lake sa pagpaptuloy ng clearing operations ng militar sa nasabing lungsod kamakalawa.
Sa ulat ni Brig. Gen. Roseller Murillo, commander ng Army’s 1st Infantry Division, nasamsam ang mga armas sa bahagi ng lawa ng Lanao sa harapan ng gusali sa Barangay Marinaut na nagsilbing ‘final stand’ ng Maute-ISIS terrorists.
Narekober sa ilalim ng tubig ng lawa ang mga armas na itinago ng Maute-ISIS terrorists sa Marawi City siege na kinabibilangan ng cal. 50 machinegun, tatlong M60 machine guns, 12 M14 rifles, apat na cal. 50 sniper rifles, dalawang AK 47 rifles, dalawang Carbine rifles, tatlong FAL rifles, M79 rifles at dalawang M16 rifles.
Nabatid na gumagamit na ng mga scuba divers ang Naval Forces Western Mindanao Command na ipinadala sa Marawi City upang tumulong sa clearing operations.
Magugunita na noong Oktubre 17 ay idineklara mismo ni Pangulong Duterte na malaya na sa terorismo ang Marawi City kasunod ng pagkakapatay sa dalawang lider ng terorista na sina Commander Isnilon Hapilon at Omar Maute. Nasundan ito ng pagtatapos ng combat operations noong Oktubre 23, 2017.
- Latest