Bebot na masahista pinabulagta!
NORTH COTABATO, Philippines — Isang babaeng massage therapist na nabigong makabalik agad sa kanyang pamilya ang natagpuang patay at may tama ng bala sa ulo sa isang liblib na lugar sa Purok Aquino, Brgy. San Miguel, Norala, South Cotabato kahapon ng umaga.
Kinilala ni P/Chief Insp. Condrado Jovero, hepe ng Norala Police, ang biktima na si Mary Joy De Pedro, 41, ng Brgy. Poblacion, Sto. Niño, South Cotabato.
Sa inisyal na imbestigasyon, galing pa umano ang biktima sa kanyang kliyente sa Purok Pag-asa 2, Brgy. San Isidro, Sto. Niño matapos na magmasahe dakong ala-1:00 noong Sabado ng hapon at nagpaalam sa kanyang live-in partner na magtutungo sa Koronadal City subalit hindi na siya makontak pa.
Kahapon lang ng umaga nang makita ang bangkay ng biktima na duguan at may tama ng bala sa ulo sa isang liblib na lugar sa Purok Aquino, Brgy. San Miguel, bayan ng Norala.
Narekober ang basyo ng bala ng cal. 9mm na ginamit sa pagbaril sa biktima sa lugar.
Inaalam pa ng mga awtoridad ang motibo sa pamamaslang na hinihinala na posibleng kilala ng biktima ang salarin.
- Latest
