Lolo iniwan ni lola, grinanada ang sarili
MANILA, Philippines — Pinaniniwalaang matinding depresyon ang dumapo sa 64-anyos na lolo na kinalasan ng kanyang misis kaya kusa itong nagpasalubong kay kamatayan matapos nitong pasabugin ang sarili sa Barangay San Vicente, bayan ng Tungawan, Zamboanga Sibugay noong Miyerkules ng gabi.
Sa ulat ni P/Chief Insp. Helen Galvez, police regional spokesperson, ang biktimang si Placido Francisco ay natagpuang nakabulagta na putol ang mga kamay, warak ang katawan at mukha bunga ng lakas ng pagsabog ng granada.
Sa imbestigasyon, bandang alas-9 ng gabi nang mag-suicide ang magsasakang biktima sa kanilang bahay sa Purok 1 sa nabanggit na barangay.
Lumilitaw sa imbestigasyon na labis na dinamdam ng biktima ang pangyayari matapos itong iwan ng kaniyang misis na tumuloy sa bahay ng anak nitong babae sa Barangay Lower Tungawan.
Nabatid na ang granada ay pag-aari ng anak nitong Cafgu na nakatago sa kuwarto.
- Latest