Stepmom grinanada ng anak, utas
MANILA, Philippines — Halos magutay ang katawan ng 47-anyos na ina-inahan habang sugatan naman ang mag-ama makaraang hagisan ng granada ng pasaway na anak na sinasabing kinastigo ng kanyang ama sa bayan ng Dimataling sa Zamboanga del Sur kamakalawa ng gabi.
Kinilala ang namatay na si Jocelyn Bakiki, 47-anyos, ina-inahan ng suspek at residente ng Purok 3, Brgy. Mercedes sa nasabing bayan ng Dimataling.
Isinugod sa Margosatubig Regional Hospital ang mga sugatang sina Barangay Kagawad Mami Bakiki, ama ng suspek at kapatid nitong si Abnerabbe Bakiki, 14.
Nasakote naman ang suspek na si Jomar Bakiki, 27.
Batay sa ulat ng pulisya na naisumite sa Camp Crame, naganap ang insidente sa kusina ng bahay ng pamilya bandang alas-7:45 ng gabi.
Ayon sa imbestigasyon, naghahapunan ang mga biktima nang dumating ang pasaway na suspek na nakainom ng alak kaya sinermunan at kinastigo ito ng kaniyang ama.
Gayunman, padabog na pumasok sa kaniyang kuwarto ang suspek at kinuha ang nakatagong granada ng ama kung saan paglabas nito ay tinanggalan ng safety pin at inihagis sa mga kumakaing biktima.
Agad namang isinugod sa pagamutan ang mga biktima pero idineklarang patay sa pagamutan ang stepmom matapos na napuruhan ng pagsabog ng granada.
- Latest