May-ari ng videoke bar, itinumba

NORTH COTABATO , Philippines  — Patay ang 29-anyos na may-ari ng videoke bar matapos itong pagbabarilin ng pinsan ng kanyang kinakasama sa Sitio Tabak, Brgy. Tacupan sa bayan ng Carmen, North Cotabato kamakalawa ng gabi. Tatlong bala sa katawan ang tumapos sa buhay ni Michelle Conuman, may ari ng videoke bar at nakatira sa Barangay Uhaw, General Santos City. Habang tinutugis naman ang suspek na si Alyas Benjie na sinasabing pinsan ng kinakasama ng biktima at nakatira sa Barangay Kibayao. Batay sa ulat, nairita ang suspek sa hindi pag-aasikaso ng biktima habang ito ay umiinom. Sugatan naman ang menor-de-edad matapos na  tamaan ng ligaw na bala sa pamamaril. Kinompronta ng suspek ang biktima habang abala ito sa pag-aasikaso sa mga customer kaya nauwi sa pamamaril. Personal na alitan ang isa sa mga anggulong sinusundan ng pulisya kaya naganap ang krimen.